နောက်ဆုံးသောကာလတွင်ရှင်သန်နေရသော်လည်း ကျွန်ုပ်တို့ ဝမ်းမြောက်မှုပြုနိုင်ပါသည်။ ထိုသို့ ဝမ်း မြောက်ရသည့်အကြောင်းရင်းများစွာအနက် အချို့ကို ဖေါ်ထုတ်ပြရပါလျင် နောက်ဆုံးသောကာလကို ကျွန်ုပ်တို့ အနေဖြင့် အချိန်၊ နာရီ၊ အပိုင်းအခြား ကန့်သတ်မှုမပြုနိုင်သော်လည်း အောက်ပါအတိုင်းမြင်တွေ့လျက် ဝမ်း မြောက်မှုပြုနိုင်ပါသည်။
(၁) နောက်ဆုံးသောကာလဟူ၍ ဖွင့်ဆိုသူတိုင်း ၁၀၀% မှားလျက်ရှိကြသည်။
(၂) နေ့ရက်များသတ်မှတ်ခြင်းက အနာဂတ်စီမံကိန်းများကို ပျက်ပြားအကျိုးယုတ်စေသည်။
(၃) သတ်မှတ်ချိန်မပြည့်စုံလာသောအခါ အချို့ယုံကြည်ချက်များကိုပျက်ပြားစေသည်။
(၄) ထိုခန့်မှတ်ချက်ကိုစိတ်ချလျက် လူတို့သည် သန့်ရှင်းခြင်းကင်စွာရှင်သန်နေကြသည်။
(၅) မပြည့်စုံလာသောဟောပြောမှုကြောင့် အနာဂါတ်ပျောက်လွင့်စေသည်။
(၆) နေ့ရက်ကာလများသတ်မှတ်ခြင်းက အလိုတော်နှင့်လည်းမညီညွတ်ပါ။
(၇) မပြည့်စုံလာခြင်းကြောင့် မယုံကြည်သူတို့ ပျက်ရယ်ပြုစရာဖြစ်စေသည်။
(၈) ထိုအချိန်သည် ခမည်းတော်လက်၌သာရှိ၍ ကျွန်ုပ်တို့ လုံးဝမပိုင်ဆိုင်ထားပါ (တမန်၊ ၁:၇)။
ထို့ကြောင့် နှုတ်ကပတ်တော်တွင် “သခင်ဘုရားက၊ ခမည်းတော်၏ တန်ခိုးအားဖြင့်စီရင်တော်မူသော အချိန်ကာလကို သိရသောအခွင့်သည် သင်တို့၌မရှိ” (တမန်၊ ၁:၇) ဆိုထားသောကြောင့် ကျွန်ုပ်တို့သည် နွားရှေ့ ထွန်ကျူးဆိုသော စကားအတိုင်း ဘုရားထက်အတတ်ကျူး၍ လူများစွာကို လမ်းလွဲစေခြင်းက စစ်မှန်သော မင်္ဂလာလည်းမဟုတ်ကြောင်း သတိပြုကြရပါမည် (တိ၊ ၂:၁၂-၁၄၊ မာ၊ ၁၃:၃၂-၃၇)။
ဆင်ခြင်မှု – ခရစ်တော်ဘုရား ပြန်ကြွလာမည်ကို သိမှတ်လျက် ထိုအရှင်ရှေ့တော်မှောက်၌ စုံလင်သော အသက်တာဖြင့်ဝင်ရောက်ခွင့်ရရှိဖို့ ရှင်သန်သွားလာကြရပါမည်။
နာမတော်မြတ်၌
ဆယ်မြူရယ်စိုးလွင်